Zindagi si Khubsurat.....TUM!!!

Ladki kya thi wo to paanv par ghungroon  bandhi hawayen thi.... ek jagah tharna naa use pasand tha aur naa hi use aata tha... Agar ek chan ko wo kahin ruk jaye to samajh me hi nahi aata ki nazren kanha rakhen... uski kaali chamakti zindagi se labrez aankhon par .... ki barish ke baad kisi gulmohar se jhar jhar tapkti paani ki bundon si uski sanso pe.....

Zindagi jaisi hi thi wo.... sochun to zindagi hi hai wo.... har ada pe nakhre.... girti uthti wo khilkhilatai..... pairo se thaap deti chalti.... Canvas utha ke rang bharti.... paani se khelti..... Kaun kaun se geet wo gungunati .... har pal nritya ki ek nayi mudra si chalti , uthti..... aisi jise ekh kar kabhi man hi nahi bhare.... kabhi gungunati... kabhi khud se hi baatein karti...

Yun uska chehra dekho to kuch bhi sundar nahi tha... naa gora tan... naa badi hirni si aankhen... naa koi sundar si sutva naak.... par uske shyamal tan par uski chanchalta ki itni chamak thi ki nazren hathi hi nahi thi.... wo itni chanchal thi ki use tasveeron me kaid karna ekdum namumkin sa tha.... photo bilkul hi blur aayegi.... mano agar sports mode par tasveer le bhi jaye to bhi us ek chan me jo mithash, jo ehshash uske chehrain par hawaon ke saath aayega... use kaid karna ho hi nahi paayega.... isliye sahi hai ki jab tak wo hai use apne saamne hi bithaye rakho.....

Use har cheez se pyaar hai.... kaanch ki chudiyaan.... basanti dupatta.... chandi ki payal...... rangeen baliyaan... sab uske jaise hi chamakte rahte the.... wo kabhi kaanch ki chudiyon ko dhup me ghuma ghuma kar dekhti ki chudiyon ka rang dhup me kaisa dikhta hai???? Dupaata to uska hamesha hi hawa me lahrata rehta...kabhi hawa se baatein karte duppte ko ungliyon me phirakar naa jane khud se hi kitni guftagu karti.. hawayen to bas jaise uske naachne ka hi intezaar karti.... uski payel ke saath hi kharwa gaati thi hawyen bhi... baliyaan to uske nakhro par hi udti thi.....

saamne hoti to bhi yakeen nahi hota ki wo sach me hai.... sochti hun ek nazar ka kaala tika laga dun uske damakte chehre par.... kahin kisi ki nazar naa lag jaye isse.... sochkar kajal bhari ungli badhati hun uske chehre ki taraf... haath aaine se takra gaye hain.....