Adhure Man ki Adhuri Kahani

Upar wale ne hume banaya hi aisa hai… Kambhakt… Defective piece. Sara dhyaan bahri saaj sajja par laga diya, din raat chehre ki cutting sudharta raha… Aankhon ki chamak ka parameter set karta raha aur iss chakkar me jo sabse jaruri component tha uspar dhyan hi nahi dia… man ko aise hi aadha adhura chod dia. Ab main man ka ye missing hissa kahan jaake dhundun. Kahin bhi kuch aisa nahi milta jisse man ka ye khaalipan thoda bhar aaye. Ab ye hai bhi Divine defect to dharti ki koi cheez kahan se mere adhure man ko pura kar paayegi… Mere lie to aasamaan se hi koi utar kar aayega ki ye lo bachha upar wale ki written apology aur tumhare man ka chutta hua hissa.

Tab tak bechaari Naina Agarwal kare to kya kare… Kahan Bhatke… Sahar sahar ki khaak chaan maare man ka adhura hissa talashne ke lie… ki bhatakne se thoda chain to milta hai ..jhuti hi sahi par umeed to bandhti hai ki beta kahin to kuch to milega… chalo pura  pura naa sahi ek tukda hi sahi… taumr bhatak kar sayad man ko lagbhag pura kar paun… ki haan kuch kami to phir bhi rahegi ki dharti ki fault lines ki tarah jab naa tab bhuchaal aayega aur man ke samjhaye saare equations bigad kar chala jaayega.

Kare Koi Bhare koi… Are itti mehnat se banaya tha thoda sa testing karke dekhni thi naaa niche bhejne se pehle… Aise hi bina testing ke market me product utaar dete ho, uparwale tere department ka quality control kasam se ekdum hopeless hai. Main kehti hun kunal se ek achha sa software integrate karna hi padega ab to jisse uparwale ke saare department me synergy rahe. Waise ye kar lene se bhi mera kuch nahi hoga ki mujhe apne khash vishwashniya sutron se abhi pata chala hai ki Main puri ki puri aapki mistake hun… Aapne special quota me mujhe manga tha… specialy bigadne ke lie, bakiyon ko jalan hoti hai main factory made nahi hande made hun… wo bhi khuda ke haathon… ab main sabko kya samjhaun ki khuda hopeless  hai insaan banana me…use man hi nahi banan aata… aata hai to pura karna nahi aata… yaa pura karna aata hai to meri tarah bas project ke blue print bana ke chod deta hai. Kambhakt mara… are ladki bana raha tha koi kavita thode likh raha tha ki open ended chod dia ki beta ab baaki hissa khud se samjho.

Halanki koi badi baat nahi hai isme khuda ki koi galti naa ho… unko Dealine ke pehle project deliver karnr ko bol dia gaya … to unhone kachha pakka jo mila target pura karne ke lie bhej dia gaya ho… ho ye bhi sakta hai ki unhone bhi reasoning karne ki kosis ki ho ki itne time me  product ready nahi ho payega… par deadline ke lie responsible koi maha painful chota khuda hoga jo jaan kha gaya hoga ki ab bhej hi do…outer body par kaam complete ho gaya hai naa… kya phark padta hai. Khuda ne samjhane ki kosis ki hogi ki Chote abhi iska man adhura hai…jitna bana hai bahut sundar hai par abhi kuch tukde missing hai… bas yahin chota ekdum khush ho gaya hoga… man hi to adhura hai naa, kya phark padta hai… de do aise hi… aise main ladki mar thode naa jayegi… khuda ne kaha hoga… nahi par taklif me rahegi… bechain rahegi. Chote khuda ne kaha hoga… aise to dharti par aadhe log rehte hain…ek ye bhi reh legi… bas aur phir kya janab hum is dharti par rote chillate aa gaye… log samjhe hum bhi baaki bachon ki tarah ro rahe honge par baat to ye thi ki hum khuda ke khilaf protest kar rahe the.

Yun agar aap dunia ko dekhen to sabkuch ekdun atomic clockwise precision se cahlta hai… mere aane se pehle puri  dunia me meri jagah kahan hogi… kuch log honge… pandreh din agar late se aate to sabkuch kitna badla hua saa hota naa… LIFE… Like LOVE, is all a matter of timing too. To jo log meri zindagi me hain, ache- bure jaise bhi ahin, perfect hain. Haan mere aane se unki zindagi me bina matlab ki uthal –puthal  jarur ho jaati hai. Jo bhi mere close friend hain, main unhe kabhi naa kbhi behad pareshaan jarur kar deti hun… islie bahut soch samjh kar kisi naye insaan se baat karti hun… Magar scorpion sign ke logon ka jo swabhav hota hai… virodhabhash se bhara hua… kisi se dosti aksar instinct par karti hun… koi achha lagta hai to bas aise hi achha lagata hai. Bina karan… phir sochti hun… buri baat hai naa… khud ko thoda rokna tha… maan lo wo jaan jaaye meri iss betarbit si zindagi me itna important hai… mujhe kitna pyara hai to use taklif hogi naa… aaj na hogi kal hogi… to phir haath rokti kyon nahi ladki??

Pata hai kyon? Kyonki man ka wo thoda sa chuta hua hissa jo hai naa… wo sahron me nahi hai… logon me hai… jise jise main mili hun… Adhura sa man thoda thoda pura hone laga hai… aur unka pura pura man thoda thoda adhura hone laga hai… hai naaa bhaut khatarnaak baat? Chalo aaj secret bata hi diya… ab batao… milego mujhse?