Life in bits and pieces

Meet me in July

Kabhi ek kahaani likhne bethi thi... jisme mansoon tha... tapakti chathon ke niche kulhad me chai piti ladki thi... bhige dupatte se chuta rang tha... Sawan ke jhule the... mehndi rache haath the... kagaz ki naav thi... bottle me band kuch chitiyan... bas ab shirsak reh gaya hai... baaki sari kahani dhul gayi hai.

# Just for you.

-------

Of Delays and More

Kya kuch nahi aata laut kar... Mansoon bhi to aata hai naa har saal usi samay. Bas ek saal der se aaya tha... jis saal bhul gayi thi tera birthday. Toh us saal barishen bhi late daakhil hui thi mere saath... belated but happy wale tag ke saath :). Yun intezaar ki bhi apni alag kasis hoti hai. Kabhi kabhi der aur intezaar lamho ko zyada yaadgaar bana dete hain... Nahin? Waise hum apno ke lie hamesha waqt nikaal lete hain... nahin?

# In wait.Yet.

--------

Yes.I Miss You.

Office me filon ke piche chipe chehre ko bhi mehshus hoti hai bahar barasti boondein... yaadon ko koi manners nahi hain,sachhi! Aane se pehle ek message kar puchna to chaiye ki main free hun ki nahi? kum se kum darwaza to khatakhatana chaiye .. par nahi... bas ghushi chali aati hai. Badtameez. koi kaise bataye ise ki... coffee ke mugs leti hun barish ko bhulane ke lie... but coffee makes rains more dense... ahhh! yeah I miss my free days. Par coffee me wo kulhad wali chai ka sondhapan nahi hota. Kyun? 

# Sigh! 

-------

Some Goodbyes are forever

Maine ek khubsurat bachpan jiya hai. Parikathaon jaisa. Par ek din sabkuch bit hi jaata hai naa... Yun kehne ko to lamhe bit kar bhi nahi bitte... Par jab tasveer me kaid lamhe wale log  bhi badlne lage... tab sayad lamho ko tata bye byee bol dena zyada sahi nahi hai? O ri ladki! kab tak kaid rakhegi ek bachpan ko... kagaz ki kasti bahane ki umar nahi ab... samjhati kyon nahi re? Kuch cheezen hamesha ke lie jaati hain... dekhti nahi apne saath wali ladkiyon ko... Sun! khol de muthhi... beh jaane de iss mansoon me... haan wahi jise ab tak kaid kia hua hai tune... chod de use kisi paper boat me... wo ab laut ke nahi aane wala...

# I let You go. Now.

------

P.S.--This monsoon pick the best piece of life to complete your story:)